ନୂଆଦିଲ୍ଲୀ, ୨/୭(ଡ଼ି ଏଚ ବି): ଜଣାଶୁଣା ଅଭିନେତ୍ରୀ ନୁସରତ୍ ଜାହାଁ ଲୋକସଭାକୁ ନିର୍ବାଚିତ ହେବାପରେ ଅଧିକ ଚର୍ଚ୍ଚାରେ ଅଛନ୍ତି। ସଂସଦକୁ ଶାଢ଼ୀ, ଶଙ୍ଖା ଏବଂ ସିନ୍ଦୂର ପିନ୍ଧି ଆସି ସମସ୍ତଙ୍କୁ ଚକିତ କରିଥିଲେ ନୁସରତ୍ ଜାହାଁ । ହେଲେ ଏବେ ସେ ଏକ ଧାର୍ମିକ କାର୍ଯ୍ୟକ୍ରମରେ ଯୋଗ ଦେବାକୁ ନେଇ ପୁଣି ଚର୍ଚ୍ଚାରେ ଅଛନ୍ତି । ହଁ , ନୁସରତ୍ ଜାହାଁ କୋଲକାତାରେ ଆୟୋଜିତ ଭଗବାନ ଶ୍ରୀ ଜଗନ୍ନାଥଙ୍କ ପବିତ୍ର ରଥଯାତ୍ରାରେ ମୁଖ୍ୟ ଅତିଥିଭାବେ ଯୋଗ ଦେବେ ବୋଲି ଜଣାଯାଇଛି। ସେ ଇସ୍କନ ପକ୍ଷରୁ ଆୟୋଜିତ ଭଗବାନ ଶ୍ରୀ ଜଗନ୍ନାଥଙ୍କ ପବିତ୍ର ରଥଯାତ୍ରାରେ ଯୋଗ ଦେବେ ।
ଏସଂପର୍କରେ ଇସ୍କନ ପକ୍ଷରୁ କୁହାଯାଇଛି ଯେ ନୁସରତ୍ ଜାହାଁଙ୍କ ବିଚାରଧାରା ଇସ୍କନ ସହ ମେଳ ଖାଉଥିବା ହେତୁ ତାଙ୍କୁ ଅତିଥିରୂପେ ନିମନ୍ତ୍ରଣ ଦିଆଯାଇଥିଲା ଯାହାକୁ ସେ ସ୍ବୀକାର ବି କରିଛନ୍ତି । ଠିକ୍ ସେହିପରି ନୁସରତ୍ ଜାହାଁ କହିଛନ୍ତି ଯେ ଜଣେ ଅଭିନେତ୍ରୀରୂପେ ସେ ରଥଯାତ୍ରାରେ ଅଂଶ ଗ୍ରହଣ କରିବେ, କାରଣ ସେ ସମସ୍ତ ଧର୍ମକୁ ସମାନଭାବେ ଦେଖନ୍ତି। ସେ ଜଣେ ମୁସଲମାନ୍ ହେଲେ ବି ଧର୍ମ ନିରପେକ୍ଷ ଭାରତର ନାଗରିକ । ତାଙ୍କ ଧର୍ମ ଲୋକଙ୍କୁ ଧର୍ମ ଭଗବାନଙ୍କ ନାଆଁରେ ଲୋକଙ୍କୁ ଭାଗ ଭାଗ କରିବାର ଅନୁମତି ଦିଏ ନାହିଁ ।
