ନୂଆଦିଲ୍ଲୀ,୧୫/୮ (ଏଜେନସି) : ଭାରତୀୟ ସେନା, ଭାରତୀୟ ନୌସେନା ଏବଂ ଭାରତୀୟ ବାୟୁସେନାର ଅଭିଯାନରେ ସମନ୍ଵୟ ରକ୍ଷା କରିବାକୁ ‘ଚିଫ୍ ଅଫ୍ ଡିଫେନ୍ସ୍ ଷ୍ଟାଫ୍’ ପଦବୀ ସୃଷ୍ଟି କରାଯିବ ବୋଲି ଗୁରୁବାର ଦିନ ଲାଲ୍ କିଲାରେ ୭୩ତମ ସ୍ୱାଧୀନତା ଦିବସ ଅଭିଭାଷଣରେ ଘୋଷଣା କରିଛନ୍ତି ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ । ପ୍ରଧାନମନ୍ତ୍ରୀ ମୋଦୀ କହିଲେ ଶସସ୍ତ୍ର ବାହିନୀ ହେଉଛି ଭାରତର ଗର୍ବ । ପରିବର୍ତ୍ତିତ ପରିସ୍ଥିତିରେ ସେନା ବାହିନୀ ମଧ୍ୟରେ ସମନ୍ଵୟ ରକ୍ଷା କରାଯିବାର ଆବଶ୍ୟକତା ରହିଛି । ଅଭିଭାଷଣରେ ପ୍ରଧାନମନ୍ତ୍ରୀ ମୋଦୀ କହିଲେ: ଆମ ସେନା ହେଉଛି ଭାରତର ଗୌରବ। ସେନାବାହିନୀଙ୍କ ମଧ୍ୟରେ ସମନ୍ଵୟ ନିବିଡ଼ କରାଇବାକୁ ଲାଲ୍ କିଲାରୁ ମୁଁ ଏକ ଗୁରୁତ୍ୱପୂର୍ଣ୍ଣ ନିଷ୍ପତ୍ତି ଘୋଷଣା କରିବାକୁ ଚାହୁଁଛି,ଭାରତରେ ଜଣେ ‘ଚିଫ୍ ଅଫ୍ ଡିଫେନ୍ସ୍ ଷ୍ଟାଫ୍’ ରହିବେ। ସେ କହିଲେ ଯେ, ତିନି ବାହିନୀର ମୁଖ୍ୟ ‘ସିଡିଏସ୍’ ସେମାନଙ୍କ ମଧ୍ୟରେ ସମନ୍ଵୟ ରକ୍ଷା କରିବା ସହ ସେମାନଙ୍କ ପ୍ରତି ଫଳପ୍ରଦ ନେତୃତ୍ୱ ପ୍ରଦାନ କରିବେ।
