କୁକୁଡାଖଣ୍ଡି,୨୪/୦୨(ଇ ରଞ୍ଜନ):-କୁକୁଡାଖଣ୍ଡି ବ୍ଲକ ଅଧିନସ୍ଥ ଅଙ୍କୁଶପୁର ଗ୍ରାମ ପଞ୍ଚାୟତ ପରିସରରେ ପଞ୍ଚାୟତ ସ୍ତରୀୟ ଜନ ଅଭିଯୋଗ ଶୁଣାଣୀ ଶିବିର ଅନୁଷ୍ଠିତ ହୋଇଯାଇଛି। ସ୍ଥାନୀୟ ସରପଞ୍ଚ ମରୁଲୀ ସେଠୀଙ୍କ ନେତୃତ୍ୱରେ ଆୟୋଜିତ ଏହି ଶିବିରରେ ବିଭିନ୍ନ ବିଭାଗର ଅଧିକାରୀମାନେ ଯୋଗଦେଇ ପଞ୍ଚାୟତବାସୀଙ୍କ ସମସ୍ୟା ସମ୍ପର୍କରେ ଶୁଣାଣୀ କରିଥିଲେ।ଏହି ଅବସରରେ ଗୋଷ୍ଠୀ ଉନ୍ନୟନ ଅଧିକାରୀ ପଲ୍ଲବୀ ସ୍ବାଇଁ, ସମିତି ସଭ୍ୟା ସୁନୀତା ସେଠୀ, ସାମାଜିକ ସୁରକ୍ଷା ଅଧିକାରୀ ମନୋଜ ପ୍ରଧାନ ଓ ଜିପିଓ ଅଶୋକ ପଟ୍ଟନାୟକ ସହ ବହୁ ବିଭାଗୀୟ ଅଧିକାରୀ ଉପସ୍ଥିତ ଥିଲେ। ସେମାନେ ପଞ୍ଚାୟତବାସୀଙ୍କ ଠାରୁ ସିଧାସଳଖ ଭାବେ ଅଭିଯୋଗ ଗ୍ରହଣ କରିଥିଲେ।ଶିବିରରେ ପ୍ରାୟ ୪୦ଟି ଅଭିଯୋଗ ଦାଖଲ ହୋଇଥିବା ବେଳେ ରାଇଝୋଳ, ଫାଦିରିପଲ୍ଲୀ, ନାଇଡ଼ୁପଲ୍ଲୀ ରେ ଡ୍ରେନେଜ, ଚଢେଇମରା ରାସ୍ତାର ବିକାଶ,ଡ୍ରେନ୍ ବ୍ୟବସ୍ଥା, ପାନୀୟ ଜଳ ସମସ୍ୟା, ଭତ୍ତା,ସୁଭଦ୍ରା ଯୋଜନାର ସୁବିଧା, ରାସନ କାର୍ଡ ଓ ଗ୍ରାମ ର ଆଲୋକୀକରଣ ଇତ୍ୟାଦି ଅଭିଯୋଗ ରହିଥିଲା।ସମସ୍ତ ଅଭିଯୋଗକୁ ପୁଙ୍ଖାନୁପୁଙ୍ଖ ତଦନ୍ତ କରି ଖୁବ୍ ଶୀଘ୍ର ସମାଧାନ କରାଯିବ ବୋଲି ଉପସ୍ଥିତ ଅଧିକାରୀମାନେ ଜନସାଧାରଣଙ୍କୁ ଆଶ୍ୱାସନ ଦେଇଥିଲେ।ଏହି କାର୍ଯ୍ୟକ୍ରମରେ ସୁରେଶ ସେଠୀ ସହ ବହୁ ପଞ୍ଚାୟତବାସୀ ଉପସ୍ଥିତ ରହିଥିଲେ।
