ବ୍ରହ୍ମପୁର,୨୧/୦୬(ଗୁରୁ ପ୍ରସାଦ ପଟ୍ଟନାୟକ): ରେଡକ୍ରସ୍ ରସିଦ ବହି ନକଲି କରି ଟଙ୍କା ଠକେଇ କରିବାକୁ ଯୋଜନା କରିଥିବା ବ୍ରହ୍ମପୁର ପୋଲିସ ଜିଲାର ଜଣେ କନଷ୍ଟେବଳଙ୍କୁ ଗିରଫ କରାଯାଇଛି। ଗିରଫ ଅଭିଯୁ୍କ୍ତ କନଷ୍ଟେବଳକ ଜଣକ ହେଲେ ଟ୍ରାଫିକ ଥାନାରେ କାର୍ଯ୍ୟରତ କୃଷ୍ଣ ନାୟକ(୩୫)। ବୈଦ୍ୟନାଥପୁର ଥାନା ପୋଲିସ ଏନେଇ କେସ୍ ନଂ ୧୩୩/୨୦ରେ ତାଙ୍କ ନାମରେ ଠକେଇର ବିଭିନ୍ନ ଦଫା ଲଗାଇ କୋର୍ଟ ଚାଲାଣ କରିଛି। ମିଳିଥିବା ସୂଚନାରୁ ପ୍ରକାଶ, ଲକ୍ଡାଉନ୍ ସମୟରେ ନିୟମ ଉଲ୍ଲଂଘନ କରୁଥିବା ଲୋକଙ୍କ ଠାରୁ ଜରିମାନା ଆଦାୟ ପାଇଁ ଜିଲା ପ୍ରଶାସନ ପକ୍ଷରୁ ପୋଲିସ ଥାନା ଓ ପ୍ରଶାସନିକ ଅଧିକାରୀଙ୍କୁ ରେଡ୍କ୍ରସ ରସିଦ ବହି ପ୍ରଦାନ କରାଯାଇଛି। ନିୟମ ଭାଙ୍ଗି ଯେଉଁ ଲୋକ ଧରାପଡ଼ନ୍ତି ତାଙ୍କ ଠାରୁ ଜରିିମାନା ଆକାରରେ ଅର୍ଥ ଆଦାୟ କରାଯାଇ ତା’ ବଦଳରେ ରେଡକ୍ରସ୍ ବହିର ରସିଦ ପ୍ରଦାନ କରାଯାଉଛି। ପ୍ରତ୍ୟେକ ଦିନ ଶହ ଶହ ଲୋକଙ୍କ ଠାରୁ ଲକ୍ଷାଧିକ ଟଙ୍କା ଜରିମାନା ଆଦାୟ ହେଉଛି। ରେଡ୍କ୍ରସ ସୋସାଇଟିର ସଭାପତି ଜିଲାପାଳ ରହିଥିବା ବେଳେ ସମ୍ପାଦକ ଦାୟିତ୍ୱରେ ଅଛନ୍ତି ବିଡିଏ ସଚିବ ସମ୍ବିତ ରାଉତ। ସେହିକ୍ରମରେ ଜିଲା ରେଡକ୍ରସ ସୋସାଇଟ ପକ୍ଷରୁ ବିଭିନ୍ନ ଥାନାକୁ ଜରିମାନା ଆଦାୟ ବେଳେ ବ୍ୟବହାର କରିବାକୁ ରେଡକ୍ରସ୍ ରସିଦ ବହି ଦିଆଯାଇଛି। ହେଲେ ସେହି ବହିରୁ ଗୋଟିଏ ବହିକୁ ବେଆଇନ ଭାବେ ଥାନା ଭିତରୁ ନେଇଯାଇ ଅଭିଯୁକ୍ତ କନଷ୍ଟେବଳ ଜଣକ ଆସିକା ଅଞ୍ଚଳର ଏକ ପ୍ରିଣ୍ଟିଂ ପ୍ରେସରେ ଛପାଇବାକୁ ଅର୍ଡର ଦେଇଥିଲେ। ନକଲି ରସିଦ ବହି ବ୍ୟବହାର କରି ଲୋକଙ୍କ ଠାରୁ ଜରିମାନା ଆକାରରେ ଟଙ୍କା ଆଦାୟ କରି ହଡ଼ପ କରିବାକୁ ଯୋଜନା କରିଥିବା ସାମ୍ନାକୁ ଆସିବା ପରେ ଖୋଳତାଡ଼ ଆରମ୍ଭ ହୋଇଥିଲା।ବିଡିଏ ସଚିବ ତଥା ରେଡକ୍ରସ ସମ୍ପାଦକ ସମ୍ବିତ ରାଉତ ଏ ନେଇ ବୈଦ୍ୟନାଥପୁର ଥାନାରେ ଲିଖିତ ଅଭିଯୋଗ କରିଥିଲେ। ତେବେ ଛପା ଯାଇଥିବା ବହି କିମ୍ବା ଚୋରି ହୋଇଥିବା ବହିକୁ ଠାବ କରାଯାଇପାରି ନାହିଁ।
