ହିଞ୍ଜିଳିକାଟୁ,୨୮ା୨(ଶେଷଦେବ ସାହୁ): ହିଂଜିଳି ଥାନା ଆଡ଼ପଡ଼ା ଗ୍ରାମରେ ପୂର୍ବ ଶତୃତାକୁ କେନ୍ଦ୍ର କରି ଗୁରୁବାର ଅପରାହ୍ନରେ ଜଣେ ମହିଳାଙ୍କୁ, ଗ୍ରାମର ଜଣେ ଯୁବକ ଶାବଳରେ ଆକ୍ରମଣ କରିଛି । ଆକ୍ରମଣର ଶିକାର ହୋଇଥିବା ମହିଳା ଜଣକ ସଂପୃକ୍ତ ଗ୍ରାମର ସୁକାନ୍ତି ଭଉଳ ।
ଏ ନେଇ ମହିଳାଙ୍କ ସ୍ୱାମୀ ସୁଶାନ୍ତ ଭଉଳ ଶୁକ୍ରବାର ହିଂଜିଳି ଥାନାରେ ଅଭିଯୋଗ କରିଛନ୍ତି । ଅଭିଯୋଗ ଭିତିରେ ପୋଲିସ ନଂ- ୬୪/୨୦ରେ ଏକ ମାମଲା ରୁଜୁ କରି ଆକ୍ରମଣ କରିଥିବା ଯୁବକ ତପନ ଭଉଳଙ୍କୁ ଥାନାରେ ଅଟକ ରଖି ପଚରା ଉଚୁରା କରୁଥିବା ଆଇଆଇସି ଅଭିମନ୍ୟୁ ଦାସ କହିଛନ୍ତି ।
ପ୍ରକାଶ ଯେ, ହିଂଜିଳି ଥାନା ଆଡ଼ପଡ଼ା ଗ୍ରାମର ତପନ ଓ ସୁଶାନ୍ତଙ୍କ ମଧ୍ୟରେ ପୂର୍ବରୁ କୌଣସି କାରଣରୁ ଶତୃତା ଲାଗି ରହିଥିଲା । ଗୁରୁବାର ଅପରାହ୍ନରେ ସୁଶାନ୍ତଙ୍କ ସ୍ତ୍ରୀ ଘର ବାରଣ୍ଡାରେ ଡିଆ ହୋଇଥିବା ବେଳେ ଯୁବକ ଜଣକ ଆସି ଅସଭ୍ୟ ଭାଷାରେ ଗାଳି ଗୁଲୁଜ କରିବା ସହ ଏକ ଲୁହା ଶାବଳରେ ମହିଳାଙ୍କୁ ଆକ୍ରମଣ କରିଥିଲା ।
ଆକ୍ରମଣରେ ମହିଳା ଜଣକ ଗୁରୁତର ଆହତ ହୋଇଥିଲେ । ସାହି ପଡ଼ୋଶୀ ମହିଳାଙ୍କୁ ଉଦ୍ଧାର କରି ଚିକିିତ୍ସା ସକାଶେ ପ୍ରଥମେ ଆଡ଼ପଡ଼ା ଗୋଷ୍ଠୀ ସ୍ୱାସ୍ଥ୍ୟ କେନ୍ଦ୍ର ଓ ପରେ ଅଧିକ ଚିକିତ୍ସା ସକାଶେ ବ୍ରହ୍ମପୁର ବଡ଼ ଡ଼ାକ୍ତରଖାନାରେ ଭର୍ତି କରିଥିଲେ । ଶୁକ୍ରବାର ସକାଳେ ମହିଳାଙ୍କ ସ୍ୱାମୀ ଏ ନେଇ ହିଂଜିଳି ଥାନାରେ ଅଭିଯୋଗ କରିଥିଲେ ।
