ଭୁବନେଶ୍ୱର,୩୦।୧( ଡିଏଚ ) : ଆସନ୍ତା ଶନିବାରଦିନ କେନ୍ଦ୍ର ବଜେଟ ଉପସ୍ଥାପନ ହେବାକୁ ଯାଉଛି । କେନ୍ଦ୍ର ଅର୍ଥମନ୍ତ୍ରୀ ନିର୍ମଳା ସୀତାରମଣ ବର୍ଷ ୨୦୨୦-୨୧ ପାଇଁ ସାଧାରଣ ବଜେଟ ଉପସ୍ଥାପନ କରିବେ । ଆର୍ଥିକ ମାନ୍ଦାବସ୍ଥା ଯୋଗୁଁ ବ୍ୟାଙ୍କଗୁଡ଼ିକର ସୁଧାର ପାଇଁ ସରକାର କେତେକ ଗୁରୁତ୍ୱପୂର୍ଣ୍ଣ ଘୋଷଣା କରିପାରନ୍ତି । ଏହାକୁ ଦୃଷ୍ଟିରେ ରଖି ଶନିବାର ସାଧାରଣତଃ ବନ୍ଦ ରହୁଥିବା ଷ୍ଟକବଜାର ଖୋଲା ରହିବ । କିନ୍ତୁ ଧର୍ମଘଟ ଯୋଗୁଁ ସେହିଦିନ ବ୍ୟାଙ୍କଗୁଡ଼ିକ ବନ୍ଦ ରହିବ । ବଜେଟ ପାଇଁ ଶନିବାରଦିନ କାରବାର ଜାରି ପାଇଁ ବମ୍ବେ ଷ୍ଟକ ଏକ୍ସଚେଞ୍ଜ ଓ ନ୍ୟାସନାଲ ଷ୍ଟକ ଏକ୍ସଚେଞ୍ଜ ପକ୍ଷରୁ ନୋଟିସ ଜାରି କରାଯାଇଛି । ଜାନୁଆରୀ ୩୧ ଓ ଫେବ୍ରୁଆରୀ ୧ ରେ ବ୍ୟାଙ୍କ ଧର୍ମଘଟ ଯୋଗୁଁ କାରବାର ବନ୍ଦ ରହିବ । ଦରମା ବୃଦ୍ଧି ପ୍ରସଙ୍ଗରେ ଇଣ୍ଡିଆନ ବ୍ୟାଙ୍କ ସଂଘ ସହିତ ଚାଲିଥିବା କଥାବାର୍ତ୍ତା ବିଫଳ ହେବାରୁ ବ୍ୟାଙ୍କ ୟୁନିଅନଗୁଡ଼ିକ ଏହି ଧର୍ମଘଟ ଡାକରା ଦେଇଛନ୍ତି ।
