ଭୁବନେଶ୍ବର ୨୭/୬(ଡ଼ିଏଚବି): ମଞ୍ଚେଶ୍ବର ଥାନା ଅଧୀନ ସପ୍ତସତୀ ମନ୍ଦିର ନିକଟରୁ ଜଣେ ଠିକାଦାରଙ୍କୁ ଅପହରଣ କରି ୬ ଲକ୍ଷ ଟଙ୍କା ମୁଣ୍ଡ ଜାମିନ ରଖିବା ଘଟଣାେର ପୁଲିସ ୩ ଅପହୃତଙ୍କୁ ଗିରଫ କରିଛି। ସେମାନଙ୍କଠାରୁ ଏକ ବାଇକ ଓ ୪ଟି ମୋବାଇଲ୍ ଫୋନ୍ ଜବତ ହୋଇଛି। ଅପହୃତ ମାନେ ହେଲେ ବାଲେଶ୍ବର ଟାଉନ୍ ଥାନା ଅଧୀନ ମୋତିଗଞ୍ଜର ସେକ୍ ମୀନାଞ୍ଜ କାଦ୍ରୀ, ବାଲେଶ୍ବର ଆଜିମାବାଦର ସେକ ରାଜା ଓ ସେକ୍ ଇମ୍ରାନ। ଆଜି ସମସ୍ତଙ୍କୁ କୋର୍ଟ ଚାଲାଣ କରାଯାଇଛି।
ସୂଚନା ମୁତାବକ, କେନ୍ଦ୍ରାପଡ଼ା ଜିଲ୍ଲା ରାଜକନିକା ଅଞ୍ଚଳର ବିକ୍ରମ ବଳ ନାମକ ଜଣେ ଠିକାଦାର ସତ୍ୟବିହାରରେ ରୁହନ୍ତି। ସେ ସହିଦନଗର ଗଜପତିନଗର ସୈନିକ ସ୍କୁଲ ନିକଟରେ ଏକ ମଲ୍ର ଫ୍ଲୋରିଂ କାମ ନେଇଥିଲେ। ତାଙ୍କ ପାଖରେ ସେକ ମୀନାଞ୍ଜ ପେଟି ଠିକାଦାର ଭାବେ କାମ କରନ୍ତି। ବିକ୍ରମ ବିଭିନ୍ନ ଆଡୁ କାମ ଆଣୁଥିବା ଦେଖି ମୀନାଞ୍ଜ ଈର୍ଷା ପରାୟଣ ହୋଇ ଉଠିଥିଲା। ସେ ବିକ୍ରମଙ୍କୁ ଅପହରଣ କରି ମୁଣ୍ଡ ଜାମିନ ରଖି କିଛି ଟଙ୍କା ଆଦାୟ କରିବେ ବୋଲି ଯୋଜନା କରିଥିଲା। ଯୋଜନା ମୁତାବକ, ଚଳିତ ମାସ ୨୧ ତାରିଖ ମୀନାଞ୍ଜ ଓ ତାର ସହଯୋଗୀମାନେ ସପ୍ତସତୀ ମନ୍ଦିର ନିକଟରୁ ବିକ୍ରମଙ୍କୁ ଏକ ନାଲି ରଙ୍ଗର ବୋଲେରୋରେ ଅପହରଣ କରି ନେଇଥିଲେ। ଏନେଇ ବିକ୍ରମଙ୍କ ଭାଇ ରାକେଶ ମଞ୍ଚେଶ୍ବର ଥାନାରେ ଅଭିଯୋଗ କରିଥିଲେ। ଏହି ସମୟରେ ଅପହୃତ ମାନେ ବିକ୍ରମଙ୍କ ବାପା ଗୋପବନ୍ଧୁଙ୍କ ମୋବାଇଲ୍କୁ କଲ କରି ୬ ଲକ୍ଷ ଟଙ୍କା ଦାବି କରିଥିଲେ। ଟଙ୍କା ନ ଦେଲେ ବିକ୍ରମଙ୍କୁ ସେମାନେ ହତ୍ୟା କରିବେ ବୋଲି ଧମକ ଦେଇଥିଲେ। ପୁଲିସ ସେହି ମୋବାଇଲ୍ ନମ୍ବରକୁ ଟ୍ରାକ୍ କରି ଜାଣିବାକୁ ପାଇଥିଲା କି ଅପହୃତ ମାନେ ବାଲେଶ୍ବର ଅଞ୍ଚଳର। ପରେ ମଞ୍ଚେଶ୍ବର ଥାନା ପୁଲିସର ଏକ ଟିମ ବାଲେଶ୍ବର ଯାଇ ବିକ୍ରମଙ୍କୁ ଉଦ୍ଧାର କରିବା ସହିତ ତାଙ୍କ ବାଇକ ଜବତ କରିଥିଲା।
