ସମ୍ବଲପୁର,୪।୨(ଡି.ଏଚ): ବୁର୍ଲା ଓଭର ବ୍ରିଜ ନିକଟରେ ବୁଲବୁଲ ନାମକ ଏକ ଯାତ୍ରୀବାହୀ ବସ ଦୁର୍ଘଟଣାଗ୍ରସ୍ତ ହୋଇଛି | ବୁର୍ଲାକୁ ପ୍ରବେଶ କରୁଥିବା ସମୟରେ ପଛପଟୁ ଦ୍ରୁତ ଗତିରେ ଆସୁଥିବା ଏକ ଟ୍ରକ ବସଟିକୁ ଧକ୍କା ଦେଇଥିଲା। ଫଳରେ ବସଟି ଓଲଟି ପଡିଥିଲା। ବସରେ ଥିବା ପ୍ରାୟ ୪୦ ଜଣ ଯାତ୍ରୀଙ୍କ ମଧ୍ୟରୁ ୨ ଜଣ ଆହତ ହୋଇଥିବାବେଳେ ବସ ଡ୍ରାଇଭର ଏବଂ କଣ୍ଡକ୍ଟର ଗୁରୁତର ଆହତ ହୋଇଥିବା ଜଣାପଡିଛି। ଘଟଣାସ୍ଥଳରେ ବୁର୍ଲା ପୁଲିସ ଏବଂ ଅଗ୍ନିଶମ ବିଭାଗ ପହଞ୍ଚି ସମସ୍ତ ଆହତଙ୍କୁ ଉଦ୍ଧାର କରି ବୁର୍ଲା ମେଡ଼ିକାଲକୁ ଚିକିତ୍ସା ପାଇଁ ଆଣିଥିଲେ। ଡ୍ରାଇଭର ଏବଂ କଣ୍ଡକ୍ଟରକୁ ମେଡ଼ିକାଲରେ ଭର୍ତ୍ତି କରାଯାଇଥିବାବେଳେ ଅନ୍ୟମାନଙ୍କୁ ପ୍ରାଥମିକ ଚିକିତ୍ସା କରି ଛାଡିଦିଆଯାଇଛି । ମିଳିଥିବା ସୂଚନା ମୁତାବକ ଏହି ବସରେ କୋରାପୁଟ ମେଡ଼ିକାଲ୍ କଲେଜର ପ୍ରାୟ ୨୫ ଜଣ ଛାତ୍ରଛାତ୍ରୀ ବୁର୍ଲା ମେଡ଼ିକାଲ କଲେଜକୁ ଆସୁଥିଲେ | ସେହି ଛାତ୍ରଛାତ୍ରୀମାନଙ୍କ ପାଇଁ ବସଟି ବୁର୍ଲାକୁ ପ୍ରବେଶ କରୁଥିଲା । ନଚେତ ବସଟି ସମ୍ବଲପୁର ଯିବାର ଥିଲା | କୋରାପୁଟର ଜୟପୁରରୁ ସମ୍ବଲପୁର ଯାଉଥିବା ବୁଲବୁଲ ବସ(ଓଡି ୦୩ ଏଫ ୮୬୫୫)କୁ କୋଲକାତାରୁ ରାଞ୍ଚି ଯାଉଥିବା ଟ୍ରକ(ଡବ୍ଲ୍ୟୁବି ୩୩ ସି ୨୨୨୭) ପଛପଟୁ ଧକ୍କା ଦେଇଥିଲା | ଏଥିରେ ବସ ଡ୍ରାଇଭର ରାଜେଶ ରେଡ୍ଡୀ ଓ କଣ୍ଡକ୍ଟର ଗଣେଶ ରଥ ଗୁରୁତର ଆହତ ହୋଇଛନ୍ତି | ଏହି ଘଟଣାଟି ଆଜି ଭୋର ସମୟ ପ୍ରାୟ ୫:୩୦ ମିନିଟରେ ଘଟିଥିବା ସୂଚନା ମିଳିଛି।
