କୋଣାର୍କ,୨୪/୮(ଡ଼ି.ଏଚ/ବ୍ୟୁରୋ): ବାସୁଦେବ ମନ୍ଦିର ନିକଟରେ ସଡ଼କ ଦୁର୍ଘଟଣା । ଅଜଣା ଗାଡ଼ି ଧକ୍କାରେ ଜଣଙ୍କର ମୃତ୍ୟୁ ହୋଇଛି । ମୃତକ ପ୍ରଶାନ୍ତ ନାୟକ ବୋଲି ଜଣାପଡିଛି । ପୁରୀ ଜିଲ୍ଲା ଗୋପ ଥାନା ଆଳୁଦଣ୍ଡା ପାଟଣା ବାସୁଦେବ ମନ୍ଦିର ନିକଟରେ ଘଟିଛି ଦୁର୍ଘଟଣା । ଖବର ଅନୁଯାୟୀ, ପ୍ରଶାନ୍ତ ଅସନ୍ତରଙ୍ଗରୁ ଜଣେ ସମ୍ପର୍କୀୟଙ୍କ ଘରୁ ଭୋଜି ଖାଇ ଫେରୁଥିଲେ । ଠିକ୍ ଏହି ସମୟରେ ଗୋପ ଥାନା ଆଳୁଦଣ୍ଡା ପାଟଣା ବାସୁଦେବ ମନ୍ଦିର ନିକଟରେ ଏକ ଅଜଣା ଗାଡ଼ି ପ୍ରଶାନ୍ତଙ୍କ ସ୍କୁଟି ସହ ଧକ୍କା ଦେଇଥିଲା । ଯାହାଫଳରେ ସେ ରାସ୍ତକଡ଼କୁ ଛିଟିକି ପଡିଥିଲେ । ରାସ୍ତା କଡ଼ରେ ପଡିଥିବା ଦେଖି ଆଳୁଦଣ୍ଡାପାଟଣା ଗ୍ରାମବାସୀ ନୟାହାଟ ଫାଣ୍ଡିକୁ ଖବର ଦେଇଥିଲେ । କିନ୍ତୁ ପୋଲିସ ଆସିବାରେ ବିଳମ୍ବ ହେବାରୁ ଗ୍ରାମବାସୀ କାକଟପୁର ,ଭୁବନେଶ୍ୱର ରାସ୍ତା ଅବରୋଧ କରିବା ସହ ଧାରଣାରେ ବସିଥିଲେ । ବିବାଦ ବଢୁଥିବା ଖବର ପାଇଁ ନୟାହାଟ ଫାଣ୍ଡି ଅଧିକାରୀ ଓ ନିମାପଡା SDPO ପହଞ୍ଚି ଲୋକଙ୍କୁ ବୁଝାସୁଝା କରିବା ସହ ବାସୁଦେବ ମନ୍ଦିର ସିଧା ଏକ stop ବୋର୍ଡ ଦେବାକୁ ପ୍ରତିଶ୍ରୁତି ଦେଇଥିଲେ । ଏହାପରେ ରାସ୍ତା ରୋକ ଉଠିଥିଲା । ଏପର୍ଯ୍ୟନ୍ତ ଅଜଣା ଗାଡିଟିକୁ ପୋଲିସ ଧରିପାରିନାହିଁ । ଶବକୁ ଜବତ କରି ପୋଲିସ ଚାରିଛକ ମେଡିକାଲକୁ ପଠାଇଛି ।
