ପାରଳାଖେମୁଣ୍ଡି,୧୬/୧୦(ପ୍ରଭାତ ପାତ୍ର) : ପାରଳାଖେମୁଣ୍ଡି ପୈାର ପରିଷଦ ପକ୍ଷରୁ ବସ୍ତି ବାସିନ୍ଦାଙ୍କୁ ଭୂମି ଯୋଗ୍ୟତା ପ୍ରମାଣ ପତ୍ର ପ୍ରଦାନ କରାଯାଇଛି। ଏସଂକ୍ରାନ୍ତରେ ଟାଉନ ହଲ ପରିସରରେ ଆୟୋଜିତ କାର୍ଯ୍ୟକ୍ରମରେ ବ୍ରହ୍ମପୁର ସାଂସଦ ଚନ୍ଦ୍ରଶେଖର ସାହୁ ମୂଖ୍ୟ ଅତିଥି ଭାବେ ଯୋଗ ଦେଇଥିବା ବେଳେ ସମ୍ମାନିତ ଅତିଥିଭାବେ ପାରଳାଖେମୁଣ୍ଡି ବିଧାୟକ କେ ନାରାୟଣ ରାଓ, ଜିଲ୍ଲାପାଳ ଅନୁପମ ସାହା, ପୈାର ପରିଷଦ ନିର୍ବାହୀ ଅଧିକାରୀ ପ୍ରମୁଖ ଯୋଗ ଦେଇ ମୋଟ ୮୯୦ ଜଣ ହିତାଧିକାରୀଙ୍କୁ ଭୂମି ଯୋଗ୍ୟତା ପ୍ରମାଣ ପତ୍ର ପ୍ରଦାନ କରିଛନ୍ତି। ରାଜ୍ୟ ସରକାରଙ୍କ ଜାଗା ମିଶନ ଯୋଜନା ମାଧ୍ୟମରେ ସହରାଞ୍ଚଳର ଭୂମିହୀନ ବେସାହାରା ବସ୍ତି ବାସିନ୍ଦାଙ୍କୁ ଥଇଥାନ ପାଇଁ ଆରମ୍ଭ ହୋଇଛି ପ୍ରକ୍ରିୟା। ଏହି ଯୋଜନାରେ ପ୍ରତ୍ୟେକ ସହରାଞ୍ଚଳରେ ପଟ୍ଟା ପାଇବା ପରେ ସ୍ଥିରୀକୃତ ହେଇପାରିଛନ୍ତି ଭୂମିହୀନ। ପାରଳାଖେମୁଣ୍ଡି ସହରର ୯ଟି ବସ୍ତିକୁ ଚିହ୍ନଟ କରି ହିତାଧିକାରୀଙ୍କୁ ଭୂମି ଯୋଗ୍ୟତା ପ୍ରମାଣ ପତ୍ର ପ୍ରଦାନ କରିବା ଲକ୍ଷ୍ୟ ଧାର୍ଯ୍ୟ କରିଛି ପ୍ରଶାସନ। ତେବେ ଏହି ପ୍ରମାଣ ପତ୍ର ଦ୍ବାରା ବସ୍ତି ବାସିନ୍ଦାଙ୍କୁ ସ୍ଥାୟୀ ପ୍ରମାଣ ପତ୍ର ଏବଂ ଅନ୍ୟାନ୍ୟ ସୁବିଧା ସୁଯୋଗ ଯୋଗାଇ ଦିଆଯାଇ ପାରିବ। ତେବେ ଭୂମି ପ୍ରମାଣ ପତ୍ର ପାଇ ରାଜ୍ୟ ସରକାରଙ୍କୁ ଧନ୍ୟବାଦ ଜଣାଇଛନ୍ତି ହିତାଧିକାରୀ।
