ନବରଙ୍ଗପୁର,୨୯ା୩(ସୁନୀଲ ଦାଶ) : ଗୋଆ,ତେଲେଙ୍ଗାନା, ଆନ୍ଧ୍ରପ୍ରଦେଶରେ ଫସିଲେ ଦାଦନ ଶ୍ରମିକ ,ଉଦ୍ଧାର କରିବା ପାଇଁ ନିବେଦନ କରିଛନ୍ତି । ନବରଙ୍ଗପୁର ଜିଲ୍ଲାର କୋଷାଗୁମୁଡା , ଡାବୁଗାଁ ,ନବରଙ୍ଗପୁର ଓ ଅନ୍ୟ ଅଞ୍ଚଳରୁ ପ୍ରାୟ ୫୦ରୁ ୭୦ ଜଣ ଦାଦନ ଶ୍ରମିକ କାମ ଅନ୍ୱେଷଣରେ ନିଜ ପିଲା ଛୁଆକୁ ନେଇ ବାହାର ରାଜ୍ୟକୁ ଯାଇଥିବା ବେଳେ କରୋନା ଜନିତ କଟକଣା ଯୋଗୁଁ ସେଇଠାରେ ଫସି ରହିଛନ୍ତି । ସେଠାରୁ ଆସିବା ପାଇଁ ଅନ୍ୟ କୌଣସି ଉପାୟ ନ ଥିବାରୁ ବାଧ୍ୟ ହୋଇ ଗଣମାଧ୍ୟମ ପ୍ରତିନିଧିମାନଙ୍କ ସାହାଯ୍ୟ ନେବାପାଇଁ ଗଣମାଧ୍ୟମ ପ୍ରତିନିଧି ମାନଙ୍କ ନିକଟକୁ ଆଜି ସକାଳୁ ଏକ ଭିଡିଓ ବାର୍ତା ମାଧ୍ୟମରେ ସନ୍ଦେଶ ଦେଇ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କୁ ଉଦ୍ଧାର କରିବା ପାଇଁ ନିବେଦନ କରିଛନ୍ତି । ପାଖରେ ଟଙ୍କା ସରିଯାଇଥିବା ସହ କରୋନା ପାଇଁ କଟକଣା ହେତୁ କୌଣସି ଖାଦ୍ୟ ସାମଗ୍ରୀ ମିଳିପାରୁନଥିବାରୁ ସେମାନେ ଦୀର୍ଘଦିନ ଧରି ଭୋକ ଉପାସରେ କାଳାତିପାତ କରୁଥିବା ଦର୍ଶାଇଛନ୍ତି । ସରକାରଙ୍କ ସହିତ ଯୋଗାଯୋଗ ର ଅନ୍ୟ କୌଣସି ଉପାୟ ନ ଥିବାରୁ ତାଙ୍କ ନିକଟରେ ଥିବା ଗଣମାଧ୍ୟମ ପ୍ରତିନିଧିଙ୍କ ନିକଟକୁ ଭିଡିଓ ସନ୍ଦେଶ ପ୍ରେରଣ କରିଛନ୍ତି । ଦାଦନ ମାନେ ବିଭିନ୍ନରାଜ୍ୟରେ ଫସି ରହିଥିବା ଦର୍ଶାଇଛନ୍ତି । ବାହାରକୁ ବାହାରିଲେ ପୋଲିସର କଟକଣା ଥିବା ବେଳେ ହାତରେ ପଇସା ନଥିବାରୁ ଭୋକ ଉପାସରେ ରହିଥିବା ଦର୍ଶାଇଛନ୍ତି । ଭିଡିଓ ରୁ ଜଣା ଯାଉଛି ଯେ ଏଥିରେ ପୁରୁଷ ଶ୍ରମିକ ସହିତ ବହୁ ମହିଳା ଶ୍ରମିକ ମଧ୍ୟ ଅଛନ୍ତି । ଏଣୁ ସରକାର ଏମାନଙ୍କୁ ଉଦ୍ଧାର କରିବା ପାଇଁ ସାଧାରଣରେ ଦାବି ହେଉଛି ।
