ରାୟଗଡା,୧୨/୨(ଡି.ଏଚ୍): ଶ୍ରାଦ୍ଧ ଭୋଜି ପାଇଁ ରୋଷେଇ କରୁଥିବାବେଳେ ନିଆଁ ଲାଗି ୪ ଜଣ ମହିଳା ଗୁରୁତର ହୋଇଛନ୍ତି । ରାୟଗଡାର ଫରେଷ୍ଟ କଲୋନୀରେ ଏଭଳି ଏକ ଅଘଟଣ ଘଟିଯାଇଛି । ମିଳିଥିବା ସୂଚନା ମୁତାବକ ମନୋରଞ୍ଜନ ସାହୁ ନାମକ ଜଣେ ବ୍ୟକ୍ତିଙ୍କ ବାପାଙ୍କ ଶ୍ରାଦ୍ଧ ପାଇଁ ଭୋଜିର ଆୟୋଜନ ହୋଇଥିଲା | ରୋଷେଇ ଚାଲିଥିବାବେଳେ କୌଣସି କାରଣରୁ ଗ୍ୟାସ ସିଲିଣ୍ଡରରୁ ଚୁଲାକୁ ସଂଯୋଗ କରୁଥିବା ପାଇପରେ ନିଆଁ ଲାଗିଯାଇଥିଲା । ଯାହାଫଳରେ ଆଖି ପିଛୁଳାକେ ନିଆଁ ଚାରିଆଡେ ବ୍ୟାପିଯାଇଥିଲା । ଏହି ସମୟରେ ପରିବା କାଟୁଥିବା ୪ ଜଣ ମହିଳାଙ୍କ ଦେହରେ ନିଆଁ ଲାଗିଯାଇଥିଲା । ତୁରନ୍ତ ମହିଳାମାନଙ୍କୁ ରାୟଗଡା ଜିଲ୍ଲା ଡାକ୍ତରଖାନାରେ ଭର୍ତ୍ତି କରାଯାଇଥିଲା । ଗୁରୁତର ମହିଳାମାନେ ହେଲେ କଳାବତୀ ମାଣ୍ଡିଙ୍ଗ, ପାର୍ବତୀ କଣ୍ଡାଗିରି, ଲକ୍ଷ୍ମୀ କଣ୍ଡାଗିରି, ସୁକାନ୍ତି ମିଣିଆକା । କଳାବତୀଙ୍କ ସ୍ୱାସ୍ଥ୍ୟ ସଂକଟାପର୍ଣ୍ଣ ହେବାରୁ ତାଙ୍କୁ କୋରାପୁଟର ସହିଦ ଲକ୍ଷ୍ମଣ ନାୟକ ମେଡିକାଲ କଲେଜକୁ ସ୍ଥାନାନ୍ତର କରାଯାଇଛି । ଗ୍ୟାସ ପାଇପ କୌଣସି କାରଣରୁ ତରଳିଯାଇ ନିଆଁ ଲାଗିଯାଇଥିବାର ସନ୍ଦେହ କରାଯାଉଛି ।
