ତାଳଚେର,୨୫।୧୨(ଡି.ଏଚ/ପ୍ରବୀଣ କୁମାର ଦାସ ):- ତାଳଚେର ଅଂଚଳରେ ପ୍ରଦୂଷଣର ଭୟାବହତା କ୍ରମାଗତ ଭାବରେ ବୃଦ୍ଧି ପାଇବାରେ ଲାଗିଛିା ଏହି ପରିପ୍ରେକ୍ଷୀରେ ଅନୁଗୋଳ ଜିଲ୍ଲାର ତାଳଚେରରୁ ପ୍ରକାଶିତ ସାପ୍ତାହିକ ସମ୍ବାଦପତ୍ର ‘କଳାନାଗ’ ପକ୍ଷରୁ ‘ତାଳଚେରରେ ପ୍ରଦୂଷଣ… ଏହାର କାରଣ ଓ ନିରାକରଣ’ ସଂପର୍କରେ ସ୍ଥାନୀୟ ପଂଚାୟତ ସମିତି ସଭାଘର ଠାରେ ଏକ ଆଲୋଚନାଚକ୍ର ଅନୁଷ୍ଠିତ ହୋଇଥିଲା । ଏହି କାର୍ଯ୍ୟକ୍ରମକୁ ଅତିଥିମାନେ ଜଗନ୍ନାଥ ମହାପ୍ରଭୁଙ୍କ ପ୍ରତିମୂର୍ତିରେ ପୁଷ୍ପମାଲ୍ୟ ଓ ପ୍ରଦୀପ ପ୍ରଜ୍ୱଳନ କରି ଶୁଭାରମ୍ଭ କରିଥିଲେ । ମୁଖ୍ୟଅତିଥି ଭାବରେ ତାଳଚେର ଓକିଲ ସଂଘର ସଭାପତି ରଣଜିତ୍ ଘୋଷ ଯୋଗ ଦେଇ ତାଳଚେରରେ ହେଉଥିବା ବାୟୁ ଏବଂ ଜଳ ପ୍ରଦୂଷଣର ମାତ୍ରା ସୀମା ଟପି ଯାଇଥିଲେ ମଧ୍ୟ ତାଳଚେରବାସୀଙ୍କ ଅତ୍ୟଧିକ ସହନଶୀଳ କ୍ଷମତା ପାଇଁ ପ୍ରଦୂଷଣ ଏଠାରେ ହାର୍ ମାନିଛି । ଆମ୍ଭେମାନେ ପ୍ରଦୂଷଣକୁ ସମର୍ଥନ ଦେଉଥିବାରୁ ଆଜି ପର୍ଯ୍ୟନ୍ତ ଧୂଳି ଧୂଆଁରେ ଚଳିଆସୁଛନ୍ତି । ଏହାକୁ ରୋକ୍ ଲଗାଇବାର ଦାୟୀତ୍ୱ ପ୍ରତ୍ୟେକ ଜନସାଧାରଣଙ୍କ କର୍ତବ୍ୟ ହେବା ଉଚିତ୍ ଏବଂ ଆମ୍ଭେ ସମସ୍ତେ ମିଳିମିଶି ଏ ନୀରବ ହତ୍ୟାକାରୀ ପ୍ରଦୂଷଣ ଭୂତାଣୁକୁ ରୋକିବା ପାଇଁ ଯୋଜନା କରିବା ଉଚିତ୍ । ମୁଖ୍ୟବକ୍ତା ଭାବରେ ଦୈନିକ ସମ୍ବାଦର ସାମ୍ବାଦିକ ଦୀପକ କୁମାର ପ୍ରଧାନ କହିଲେ ଯେ, ଆମ୍ଭେମାନେ ସମସ୍ତେ ତାଳଚେରରେ ବଢ଼ୁଥିବା ବାୟୁ ପ୍ରଦୂଷଣ ଏବଂ ଜଳ ପ୍ରଦୂଷଣ ପାଇଁ ଦାୟୀ କାରଣ ନିଜର ସାମାନ୍ୟ ଖର୍ଚ୍ଚ ବଂଚାଇବାକୁ ଯାଇ ଆମ୍ଭେମାନେ ପ୍ରତ୍ୟେକ ଦିନ ଯେଉଁ କଂଚା କୋଇଲାକୁ ଜାଳେଣି ଭାବରେ ବ୍ୟବହାର କରୁଛନ୍ତି ତାହା ନିଜ ପରିବାରର ସଦସ୍ୟ, ଶିଶୁ ଓ ବୟୋଜ୍ୟେଷ୍ଟଙ୍କ ସମେତ ଆମ୍ଭ ପଡୋଶୀ ମାନେ କୋଇଲା ଧୂଆଁରେ ମିଶ୍ରିତ ବିଶାକ୍ତ ବାସ୍ପକୁ ଗ୍ରହଣ କରିବା ଦ୍ୱାରା ବିଭିନ୍ନ ରୋଗର ଶୀକାର ହେଉଛନ୍ତି । ଦେଶ, ରାଜ୍ୟ ଏବଂ ସ୍ଥାନୀୟ ଅଂଚଳର ଆର୍ଥୀକ ବିକାଶ ପାଇଁ କଳ କାରଖାନା ଏବଂ କୋଇଲା ଉତ୍ପନ ଆବଶ୍ୟକତା ଅଛି । ମାତ୍ର ଆମ୍ଭମାନଙ୍କର ଚାହିଦା ପୂରଣ ପାଇଁ ଆମ୍ଭେମାନେ ଅନେକ ସମୟ ପ୍ରଦୂଷଣ ଭଳି ମହାମାରୀକୁ ଜାଣତରେ ପ୍ରୋତ୍ସାହିତ କରିଥାଉ । ନିର୍ବାଚିତ ପ୍ରତିନିଧିଙ୍କ ଠାରୁ ଆରମ୍ଭ କରି କଳକାରଖାନାର ମାଲିକ, ସରକାର ଏବଂ ସରକାରୀ ଅଧିକାରୀମାନେ ପାରିପାଶ୍ୱିର୍କ ଉନ୍ନତି କଥା ଭୁଲି ଯାଇଥାନ୍ତି । କେବଳ ସ୍ୱଳ୍ପ ମାତ୍ରାରେ କର୍ମ ନିଯୁକ୍ତି ଏବଂ ଆର୍ଥୀକ ସହାୟତା କଥା ବିଚାରକୁ ନିଆଯାଇଥାଏ । ମାତ୍ର ସବୁଠାରୁ ଗୁରୁତ୍ୱପୂର୍ଣ୍ଣ କଥାକୁ ସେମାନେ ଆଡେଇ ଚାଲିଯାଆନ୍ତି । ତାହା ହେଉଛି ସ୍ୱାସ୍ଥ୍ୟ ଗତ ସମସ୍ୟା । ଯେତେବେଳେ ସ୍ୱାସ୍ଥ୍ୟ କଥା ବିଚାରକୁ ନିଆଯାଏ ସେତେବେଳେ ପ୍ରଦୂଷଣ କଥା ଆମ୍ଭମାନଙ୍କ ମନକୁ ଆସେ । ଜଳ ଏବଂ ବାୟୁ ପ୍ରଦୂଷଣରୁ ମୁକ୍ତି ପାଇଁ ସ୍ଥାନୀୟ ପ୍ରଶାସନ, ଜନ ପ୍ରତିନିଧି ସର୍ବୋପରି ତାଳଚେରର ସର୍ବସାଧାରଣଙ୍କର ମିଳିତ ଆନେ୍ଦାଳନର ଆବଶ୍ୟକତା ଅଛି । ସମ୍ମାନୀତ ଅତିଥି ଭାବରେ ତାଳଚେର ସରକାରୀ ଆଇ.ଟି.ଆଇ.ର ଅଧ୍ୟକ୍ଷ ସ୍ୱରୂପ ସଂପତ ରଥ କହିଲେ ଯେ, ପ୍ରଦୂଷଣର ପ୍ରୋତ୍ସାହକ ହେଉଛନ୍ତି ଆମ୍ଭେମାନେ । ତେଣୁ ଆମ୍ଭେମାନେ ଚାହିଁଲେ ପ୍ରଦୂଷଣକୁ ରୋକି ପାରିବା । ଏଥିପାଇଁ ପ୍ରତ୍ୟେକ ସଚେତନ ହେବା ସହିତ ଠିକ୍ ଭାବରେ କାର୍ଯ୍ୟ କରିବା ଉଚିତ୍ । ଅନ୍ୟତମ ସମ୍ମାନୀତ ଅତିଥି ବରିଷ୍ଠ ସମାଜସେବୀ ଆର୍ତତ୍ରାଣ ପାଣି ତାଳଚେରର ପ୍ରଦୂଷଣ ର ମାତ୍ରା ଆମ ଦେଶର ଅଗ୍ରଭାଗରେ ରହିଛି । ଏଥିପାଇଁ ଆମ୍ଭର ନିର୍ବାଚିତ ପ୍ରତିନିଧି ମାନେ ପ୍ରଦୂଷଣର ନିରାକରଣ ପ୍ରତି ଧ୍ୟାନ ଦେଉ ନାହାନ୍ତି । ମଂଚାସୀନ ଅନ୍ୟତମ ଅତିଥି ଶ୍ରମିକନେତା ଆନନ୍ଦ ଚନ୍ଦ୍ର ଆଚାର୍ଯ୍ୟ ପ୍ରଦୂଷଣ ପାଇଁ ସ୍ଥାନୀୟ ଅଂଚଳର କଳାକାରଖାନା ଓ କୋଇଲା ଖଣିର ଅଧିକାରୀମାନେ ଦାୟୀ ଏବଂ ଏହାର ପ୍ରତିକାର ପାଇଁ ସେମାନଙ୍କର ଆଦୌ ଇଚ୍ଛା ଶକ୍ତି ନାହିଁ ବୋଲି କ୍ଷୋଭର ସହ ପ୍ରକାଶ କରିଥିଲେ । ‘କଳାନାଗ’ର ସଂପାଦକ ମଦନ ମୋହନ ସାହୁଙ୍କ ଅଧ୍ୟକ୍ଷତାରେ ଅନୁଷ୍ଠିତ ଆଲୋଚନା ଚକ୍ରରେ ତାଳଚେର ୱାର୍କିଂ ଜର୍ଣ୍ଣାଲିଷ୍ଟ ଆସୋସିଏସନ୍ ସଭାପତି ଧୀର ମୋହନ ରାୟ ମଂଚ ସଂଚାଳନ ଦାୟୀତ୍ୱ ତୁଲାଇ ଥିଲେ । ଅନ୍ୟମାନଙ୍କ ମଧ୍ୟରେ ଏରିଆ ଖବର ପାକ୍ଷିକ ଖବରକାଗଜର ସଂପାଦକ ସୌଭାଗ୍ୟ ଚନ୍ଦ୍ର ନାୟକ, ସାମ୍ବାଦିକ ଅଜୟ କୁମାର ନାୟକ, ପ୍ରିୟମାଧବ ଦାସ, ବାସୁଦେବ ପ୍ରଧାନ, ବାପୁଜୀ ସାମଲ, ମନିଲ ମହାରଣା, ବିଘ୍ନେଶ୍ୱର ସାହୁ, ସମାଜସେବୀ କ୍ଷିରୋଦ ସାହୁ, ଅସିତ୍ କୁମାର ସାହୁ, ଆସୁତୋଷ ଦାସ, ଅତିସ୍ କୁମାର ଦାସ, ଦୟାସାଗର ଅତବୁଦ୍ଧି, ଜିତେନ୍ଦ୍ର କୁମାର ମହାପାତ୍ର, ଶିକ୍ଷାବିଦ୍ ନିରାକାର ସାମଲ, ତାଳଚେର ସରକାରୀ ଆଇ.ଟି.ଆଇ.ର ଛାତ୍ରମାନେ ଉପସ୍ଥିତ ରହି ଆଲୋଚନାରେ ଅଂଶ ଗ୍ରହଣ କରିଥିଲେ । ପରବର୍ତି ସମୟରେ ସ୍ଥାନୀୟ ଅଂଚଳର ସ୍ୱେଚ୍ଛାସେବୀ, ବୁଦ୍ଧିଜୀବୀ, ଶିକ୍ଷାବିଦ୍ ଓ ଜନ ପ୍ରତିନିଧି ମାନଙ୍କୁ ନେଇ ଏକ କମିଟି ଗଠନ କରାଯିବାକୁ ସହମତ ପ୍ରକାଶ ପାଇଥିଲା ।
