ପାଇକମାଳ,୧୩।୧୨(ଡି.ଏଚ/କୁଞ୍ଜବିହାରୀ ସାହୁ ) : ବରଗଡ ଜିଲା ପଦମପୁର ଉପଖଣ୍ଡ ପାଇକମାଳ ବ୍ଲକରୁ ଦଶ କିମି ଦୁରରେ ଗନ୍ଧମାର୍ଦ୍ଦନ ପାହାଡ ଶୀର୍ଷରେ ମାଁ ଦୁର୍ଗେଇ ଦେବୀଙ୍କ ପୀଠରେ ବାର୍ଷିକ ପୂଜାପର୍ବ ସମାପନ ହେ।ଇଛି । ଏହି ପୂଜାପର୍ବ ପ୍ରତିବର୍ଷ ମାର୍ଗଶୀର ମାସର ପୂର୍ଣମି ତିଥିରେ ବୁକା, କୁକୁଡ଼ା, ନଡ଼ିଆ, ଧୂପଦୀପ ଆଦି ଅର୍ପଣ କରି ମହାସମାରୋହରେ ପାଳନ କରାଯାଏ । ଗନ୍ଧମାର୍ଦ୍ଦନ ଜଙ୍ଗଲର ଦୁର୍ଗମ ପଥରେ ଆବୁଡାବୁ ଚଟାଣି ଘାଟିରାସ୍ତା ଦେଇ ଛୋଟପିଲାରୁ ବୃଦ୍ଧ ପର୍ଯ୍ୟନ୍ତ ସମସ୍ତ ଭକ୍ତ ନିର୍ଭୟ ଓ ସାହାସିକତାର ସହ ପାଦରେ ଚାଲି ଚାଲି ମାଁଙ୍କ ପୂଜାପୀଠରେ ପହଞ୍ଚି ପୂଜାର୍ଚ୍ଚନା କରିଥାନ୍ତି । ଭକ୍ତ ମାନଙ୍କ ବିଶ୍ୱାସ ରହିଛି ମାଁ, ଦୂର୍ଗେଇ ଦେବୀଙ୍କ ଠାରେ ନିଜର ମନୋକାମନା ପୁରଣ କରିବା ପାଇଁ ଆରାଧନା କଲେ ତାହାକୁ ମାଁ ସଫଳ କରିଥାନ୍ତି । ଏଠାରେ ଆବହମାନ କାଳରୁ ମାଁଙ୍କ ପୂଜାପର୍ବ ପାଳନ ହେଉଅଛି । ମାଁଙ୍କ ପୂଜା କନ୍ଧ ଆଦିବାସୀ ସଂପ୍ରଦାୟର ଲୋକେ କରିଥାନ୍ତି । ମାଁଙ୍କୁ ଦର୍ଶନ କରିବା ପାଇଁ ବରଗଡ, ସମ୍ବଲପୁର, ବଲାଙ୍ଗୀର, କଳାହାଣ୍ଡି, ପଡୋଶୀ ରାଜ୍ୟ ଛତିଶଗଡ଼ ଅଂଚଳ ରୁ ହଜାର ହଜାର ଭକ୍ତଙ୍କର ସୁଅ ଛୁଟିଥାଏ । ମାଁ ଦୁର୍ଗେଇ ଦେବୀଙ୍କ ର ମୁଖ୍ୟ ପୂଜକ ନବୀନ ମଲ୍ଲିକ, ଅନିରୁଦ୍ଧ ମଲ୍ଲିକ, ନକୁଲ ମଲ୍ଲିକ ଆଦି ପୂଜା କାର୍ଯ୍ୟ ତୁଲାଉଥିବା ବେଳେ ଦୁର୍ଗେଇ ଦେବୀ ପୂଜା କମିଟି ସଭାପତି ମଧୁସୂଦନ ପାଣ୍ଡେ , ଉପ ସଭାପତି ପୂର୍ଣ୍ଣ ଚନ୍ଦ୍ର ଭୋଇ , ସଂପାଦକ ବେଣୁଧର ମଲ୍ଲିକ, କୋଷାଧ୍ୟକ୍ଷ ହୀରଣ ମଲ୍ଲିକ ତଥା କମିଟିର ସଭ୍ୟ ବୃନ୍ଦ ଉପସ୍ଥିତ ରହି ପୂଜା କାର୍ଯ୍ୟକୁ ସୁଚାରୁରୂପେ ସମାପନ କରିିଥିଲେ ।
